លេខាធិការដ្ឋានអង្គការ សមាគមខ្មែរកម្ពុជាក្រោមប្រជុំប្រចាំខែឧសភា

ថ្ងៃទី២៩ ខែឧសភា ឆ្នាំ២០១៦ លេខាធិការដ្ឋាននៃអង្គការ - សមាគមខ្មែរកម្ពុជាក្រោមប្រចាំព្រះរាជាណាចក្រកម្ពុជាក្រោមបានបើកអង្គប្រជុំប្រចាំខែឧសភា នៅទីស្នាក់ការរបស់សមាគមសិទ្ធិមនុស្ស និង អភិវឌ្ឍន៍ ភូមិគោកឃ្លាំង សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ក្រោមអធិបតីរបស់លោកតាំង សារៈ ប្រធានលេខាធិការដ្ឋាន និង ជាអធិបតីនៃមិត្តសមាគមខ្មែរកម្ពុជាក្រោម ។

អង្គប្រជុំបានលើកឡើងពិភាក្សានូវរបៀបវារៈចំនួនបី គឺ ករណីគំរូខ្លោងទ្វារថ្មីនៅខេត្តព្រះត្រពាំង បញ្ហារៀបចំទិវាបាត់បង់ទឹកដី និង ការរៀបចំខួប១៥ឆ្នាំ ថ្ងៃសហព័ន្ធខ្មែរកម្ពុជាក្រោមបានចូលជាសមាជិកអង្គការ UNPO ។

អំពីគំរូខ្លោងទ្វារថ្មីនៅខេត្តព្រះត្រពាំង ដែលមន្ទីរស្ថាបនាខេត្តនេះកំពុងស្ទង់មតិប្រជាពលរដ្ឋ លេខាធិការដ្ឋានបានឯកភាពប៉ុន្មានចំណុចដូចខាងក្រោមនេះ ៖

១. ទទួលយកគំរូមានលេខកូដសម្គាល់ MS13 ដែលបានបង្ហាញក្នុងការស្ទង់មតិ តែសំណូមពរឲ្យបន្ថែមរចនាប័ទ្មខ្មែរដូចជា រូបគ្រុឌ កិន្នរ នាគ ។ល។

២. ដោយសល់ឃើញថា ខ្លោងទ្វារចាស់ជាកេរ្តិ៍មរតករបស់ខ្មែរ ដូច្នោះការស្ទង់មតិនេះ មិនត្រូវអនុញ្ញាតិឲ្យមានការចូលរួមរបស់ជនជាតិយួន ចិន ឬ ជនជាតិដទៃក្រៅពីជនជាតិខ្មែរបានទេ ។

អង្គប្រជុំក៏បានឯកភាពថា នឹងធ្វើលិខិតជូនទៅរដ្ឋាភិបាលវៀតណាមតាមរយៈក្រសួងការបរទេស និង សហប្រតិបត្តិការកម្ពុជា និង ទៅគណៈកម្មាធិការប្រជាជនខេត្តព្រះត្រពាំងតាមរយៈស្ថានទូតវៀតណាមប្រចាំកម្ពុជា ។

គួររំឭកឡើងថាលេខាធិការដ្ឋានអង្គការ – សមាគមខ្មែរកម្ពុជាក្រោមប្រចាំព្រះរាជាណាចក្រកម្ពុជា បានបង្កើតឡើយនៅឆ្នាំ២០១៣ ដើម្បីប្រមូលផ្ដុំអង្គការ សមាគមខ្មែរកម្ពុជាក្រោមនៅកម្ពុជាក្រោមឲ្យឯកភាពដើម្បីដោះស្រាយបញ្ហាខ្មែរកម្ពុជាក្រោម ដោយមានសមាជិកជាអង្គការ សមាគម ទាំង ១១ ។ ប្រធានលេខាធិការដ្ឋានត្រូវបានប្ដូរវេនមួយឆ្នាំមួយដង នៅឆ្នាំ២០១៥ ប្រធានលេខាធិការដ្ឋានត្រូវបានទទួលបន្ទុកដោយ លោក ប៊ុន មុនី ប្រធានមិត្តសមាគម ហើយ ឆ្នាំ២០១៦ លោក តាំង សារៈ អធិបតីមិត្តសមាគមក៏បានទទួលបន្ទុកជាប្រធានលេខាធិការដ្ឋាននេះផងដែរ ។