ខ្មែរកម្ពុជាក្រោម នៅកម្ពុជាប្រារព្ធពិធីអំណរបុណ្យចូលឆ្នាំ

ថាច់ រតនា | កាលពីថ្ងៃទិ០៣ ខែមេសា ឆ្នាំ២០១៦ មិត្តសមាគមខ្មែរកម្ពុជាក្រោម និង សមាគមខ្មែរកម្ពុជាក្រោមបានប្រារព្ធពិធីអបអរសាទរបុណ្យចូលឆ្នាំថ្មីនៅវត្តសាមគ្គីរង្សី ភូមិទ្រា២ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ដោយមានអ្នកចូលរួមសរុបជិត ៥០០ នាក់ ។

ពិធីនេះបានចាប់ដើមពីម៉ោង០៩ ព្រឹក និង ចប់នៅវេលាម៉ោង១៣ ដោយមានកម្មវិធីសាសនកិច្ច និង លេងល្បែងប្រជាប្រិយ ។ លោក ស៊ីម វិចិត្រ អគ្គលេខាធិការនៃមិត្តសមាគមខ្មែរកម្ពុជាក្រោមបានឲ្យដឹងថា សមាគមលោកតែងតែរៀបចំកម្មវិធីនេះជារៀងរាល់ឆ្នាំ ដើម្បីរំឭកគុណវីរបុរសដែលបានបូជាជីវិតដើម្បីជាតិ សាសនា និង មាតុភូមិ នៃខ្មែរកម្ពុជាក្រោម ហើយនេះក៏ជាឱកាសសម្រាប់យុវជន ជាពិសេសយុវជនមិត្តសមាគមខ្មែរកម្ពុជាក្រោមសំដែងកតញ្ញូតាធម៌ចំពោះចាស់ព្រឹទ្ធាចារ្យដែលមានគុណបំណាច់ចំពោះសង្គមខ្មែរកម្ពុជាក្រោម ។

ថ្លែងក្នុងកម្មវិធីជួបជុំអង្គការ សមាគមខ្មែរកម្ពុជាក្រោម ស្ថិតនៅក្នុងពិធីអបអរសាទរបុណ្យចូលឆ្នាំថ្មីនេះផងដែរ លោក សម្បត្តិ ស៊ីណា ប្រធានស្នងការយុវជន វប្បធម៌ អប់រំ និង កីឡា របស់មិត្តសមាគមខ្មែរកម្ពុជាក្រោមបានលើកឡើងថា ពិធីបែបនេះត្រូវបានប្រារព្ធឡើងដើម្បីរក្សាវប្បធម៌ ប្រពៃណីខ្មែរ នាពេលដែលអាជ្ញាធរយៀកណាមកំពុងខិតខំលុបបំបាត់វប្បធម៌ អារ្យធម៌ ខ្មែរនៅដែនកម្ពុជាក្រោម ហើយខ្មែរកម្ពុជាក្រោមត្រូវរស់នៅក្រោមការកៀបសង្កត់ពីសំណាក់រដ្ឋាភិបាលក្រុងហាណូយ ។

ក្រោយកម្មវិធីជួបជុំ ពិធីក៏បានបន្ត និង បញ្ចប់ដោយកម្មវិធីលេងល្បែងប្រជាប្រិយ និង សិល្បៈ ដោយមានការចូលរួមរបស់យុវជន និស្សិត កម្មករ កម្មការនី ខ្មែរកម្ពុជាកា្រម និង ខ្មែរមកពីគ្រប់ទិសទី ដែលកំពុងសិក្សា និង ប្រកបមុខរបររកស៊ីនៅក្រុងភ្នំពេញ ។

វិទ្យុសេរីភាពកម្ពុជាក្រោម ក៏សូមរំឭកឡើងថា ចូលឆ្នាំថ្មី ប្រពៃណីជាតិ ឆ្នាំវកអដ្ឋស័ក ពុទ្ធសករាជ ២៥៦០ នឹងត្រូវបានប្រារព្ធក្នុងរយៈពេល ៤ ថ្ងៃ គឺ ថ្ងៃទី១៣ ១៤ ១៥ និង ១៦ ខែមេសា ឆ្នាំ២០១៦ ត្រូវនឹងថ្ងៃ ០៧ ០៨ ០៩ និង ១០ កើត ខែចេត្រ ពុទ្ធសករាជ ២៥៥៩ ខាងមុខនេះ។