ពីថ្ងៃទី១៣ ដល់ ថ្ងៃទី១៥
ខែឧសភា ឆ្នាំ២០១៦ គណៈប្រតិភូនៃមិត្តសមាគមខ្មែរកម្ពុជាក្រោម
ដឹកនាំដោយលោក ស៊ីម វិចិត្រ អគ្គលេខាធិការ បានចុះទៅសួរសុខទុក្ខ និង
ពិនិត្យស្ថានភាពគ្រួសារខ្មែរកម្ពុជាក្រោមក្រោមមួយរូប
ត្រូវអាជ្ញាធរមូលដ្ឋានរើសអើង និង ចោទប្រកាន់ថាជនជាតិយួនរស់នៅខុសច្បាប់
។
គ្រួសារខ្មែរកម្ពុជាក្រោមត្រូវបានរើសអើងនេះ
មានឈ្មោះ ជោត សាវ៉េត (ឈ្មោះធ្លាប់ហៅ ថាច់ ធីសាវ៉េត) កើតឆ្នាំ១៩៥៥
នៅចំណុះវត្តដើមអំពិល ស្រុកជ្រោយញរ ខេត្តឃ្លាំង ទឹកដីកម្ពុជាក្រោម
ហើយបានតាំងទីលំនៅនៅភូមិក្បាលទាហាន ឃុំឈើតុំ ស្រុកក្រគរ
ខេត្តពោធិ៍សាត់តាំងពីឆ្នាំ ១៩៨៨ មកម្ល៉េះ ។
ថ្មីៗនេះ គ្រួសារអ្នកស្រី
ត្រូវបានអាជ្ញាធរមូលដ្ឋាន ជាពិសេសប្រធានភូមិក្បាលទាហាន និង មេប៉ុស្តិ៍រង
ប៉ុស្តិ៍នគរបាលឃុំឈើតុំ រើសអើង និង ធ្វើទុក្ខបុកម្នេញ ។
តាមព័ត៌មានដែលអ្នកស្រីបានរៀបរាប់ជូនគណៈប្រតិភូ
អ្នកច្រើនលើកច្រើនសារហើយ
អ្នកស្រីត្រូវនគរបាលឃុំកោះហៅទៅសាកសួរដោយមានពាក្យប្ដីគ្មានមូលដ្ឋាន
ហើយក៏ត្រូវនគរបាលឃុំគំរាមកំហែង ជម្រិតទារប្រាក់ពីបីលានរៀល ដល់
ប្រាំលានរៀលម្ដងៗ ។
មិនត្រឹមតែប៉ុណ្ណោះ
អ្នកស្រីបានឲ្យដឹងថា
ប្រធានភូមិតែងតែហាមឃាត់មិនឲ្យប្រជាជននៅទីនោះជួលរោងការ និង
ឧបករណ៍តន្ត្រីរបស់គ្រួសារអ្នកស្រី ។
កាលពីចុងខែមេសា ឆ្នាំ២០១៦
កន្លងមកនេះ តបទៅតាមពាក្យបណ្ដឹងរបស់ប្រធានភូមិក្បាលទាហាន អំពីករណីអ្នកស្រីជោត
សាវ៉េត ជាជនជាតិយួនរស់នៅខុសច្បាប់ គណៈកម្មការចម្រុះរបស់ស្រុកក្រគរ និង
ខេត្តពោធិ៍សាត់ បានចុះទៅត្រួតពិនិត្យរដ្ឋបាលគ្រួសារអ្នកស្រី ។
ក្រោយពេលបានពិនិត្យឃើញថា អ្នកស្រីជោត សាវ៉េត
មានសមាជិករបស់មិត្តសមាគមខ្មែរកម្ពុជាក្រោម
ជាភស្តុតាងបញ្ជាក់អ្នកស្រីពិតជាជនជាតិខ្មែរ
ហើយមានសិទ្ធិរស់នៅស្របច្បាប់ក្នុងព្រះរាជាណាចក្រកម្ពុជា
គណៈកម្មការចម្រុះក៏បានសូមទោសអ្នកស្រី
ហើយពន្យល់ករណីនេះជូនអាជ្ញាធរមូលដ្ឋាន ទោះបីយ៉ាងនេះក្ដី មេប៉ុស្តិ៍រង
ប៉ុស្តិ៍នគរបាលឃុំឈើតុំ
នៅរឹបអូសទ្រព្យសម្បត្តិរបស់គ្រួសារអ្នកស្រីក្នុងតម្លៃសរុបប្រហែលប្រាំលានរៀល
។
តាមការពិនិត្យជាក់ស្ដែងរបស់គណៈប្រតិភូនៃមិត្តសមាគមខ្មែរកម្ពុជាក្រោម
គ្រួសារអ្នកស្រី ជោត សាវ៉េត រស់នៅក្នុងតំបន់ព្រៃជ្រៅ ដាច់ស្រយាល
តែមានភាពទំនាក់ទំនងជិតស្និទ្ធនឹងអ្នកស្រុកអ្នកភូមិ
ពោលគឺប្រជាពលរដ្ឋជារាស្ត្រសាមញ្ញគោរព រាប់អានគ្រួសារអ្នកស្រី
ហើយមិនដែលមានការរើសអើងថាយួនអ្វីឡើយ ។
ដោយមានការណែនាំពីលោក ប៊ុន
មុនី ប្រធានមិត្តសមាគមខ្មែរកម្ពុជាក្រោម គណៈប្រតិភូបានចងក្រងសំណុំរឿងនៃករណីនេះ
ហើយបានទាក់ទងនឹងមន្ត្រីអង្គការលីកាដូ
ប្រចាំខេត្តពោធិ៍សាត់ដើម្បីសហការដោះស្រាយវិវាទជូនគ្រួសារលោកស្រី ។
ព័ត៌មានដែលស្នងការព័ត៌មាននៃមិត្តសមាគមខ្មែរកម្ពុជាក្រោមទទួលបាន
រហូតល្ងាចថ្ងៃទី១៩ ខែឧសភា ឆ្នាំ២០១៦ គ្រួសារអ្នកស្រីជោត សាវ៉េត
មិនទាន់ទទួលការគំរាមកំហែង ឬ រំខានណាពីអាជ្ញាធរមូលដ្ឋានដូចមុនៗ ទៀតឡើយ ។
ចែករំលែកអត្ថបទ
