ពុទ្ធបរិស័ទខ្មែរកម្ពុជាក្រោម ប្រារព្ធពិធីបុណ្យវិសាខបូជា នៅវត្តសាមគ្គីរង្សី ក្រុងភ្នំពេញ

ពិធីបុណ្យវិសាខបូជា ជាពិធីបុណ្យមួយដ៏វិសេសបំផុតក្នុងព្រះពុទ្ធសាសនាដែលពុទ្ធសាសនិកជនខ្មែរ ខ្មែរកម្ពុជាក្រោម និង សាសនិកជននៅលើពិភពលោក ជាពិសេសពុទ្ធសាសនិកជននៃនិកាយធំៗ ០២ ក្នុងព្រះពុទ្ធសាសនាគឺនិកាយថេរវាទ និង និកាយអាចរិយវាទតែងតែប្រារព្ធធ្វើឡើងជារៀងរាល់ឆ្នាំ នៅថ្ងៃទី ១៥ ខែពិសាខ ។ ពិធីនេះប្រារព្ធធ្វើឡើងដើម្បីរំលឹកទៅដល់អភិលក្ខិតសម័យចំនួន៣ ក្នុងព្រះពុទ្ធកាលនៃព្រះសម្មាសម្ពុទ្ធព្រះបរមគ្រូទ្រង់ព្រះនាមគោត្ដមនៃយើងគឺ៖

១/ អភិលក្ខិតសម័យថ្ងៃដែលព្រះពុទ្ធជាម្ចាស់ទ្រង់ប្រសូតចាក់ពីឧទរនៃព្រះពុទ្ធមាតា ។

២/ អភិលក្ខិតសម័យថ្ងៃដែលព្រះពុទ្ធជាម្ចាស់ទ្រង់ត្រាស់ដឹងនៅអនុត្តរសម្មាសម្ពោធិញ្ញាណ ។

៣/ ថ្ងៃដែលព្រះពុទ្ធជាបរមគ្រូទ្រង់យាងចូលកាន់អនុបាទិសេសនិព្វាន ។

ដោយឡែកកាលពីថ្ងៃសុក្រ ១៥ កើត ខែពិសាខ ឆ្នាំវកអដ្ឋស័ក ព.ស ២៥៥៩ កន្លង់ទៅថ្មីៗ នេះព្រះសង្ឃព្រមទាំងពុទ្ធបរិស័ទវត្តសាមគ្គីរង្សី ហៅវត្តខ្មែរកម្ពុជាក្រោម ស្ថិតនៅភូមិទ្រា០២ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ក៏បានប្រារព្ធធ្វើពិធីបុណ្យវិសាខបូជា ដែលជាបុណ្យដ៏វិសេសក្នុងព្រះពុទ្ធសាសនាផងដែរ ដោយប្រារព្ធឡើងចាប់ពីម៉ោង ៤:៣០ នាទី ទៅតាមកន្លង់នៃព្រះពុទ្ធសាសនា ដូចជាប្រារព្ធពិធីនមស្សការព្រះរតនត្រ័យបូជាគ្រឿងសក្ការបូជាចំពោះព្រះរតនត្រ័យដែលមានព្រះពុទ្ធស្នងព្រះអង្គជាប្រធាន និង អារាធនានិមន្តព្រះសង្ឃចំរើនព្រះបរិត្តជាដើម ។

គួរកត់សម្គាល់ថាពិធីបុណ្យដែលចាត់ទុកជាពិធីបុណ្យពិសេសក្នុងព្រះពុទ្ធសាសនាមានចំនួន២/ គឺ ពិធីបុណ្យវិសាខបូជាដែលប្រារព្ធធ្វើឡើងនៅថ្ងៃ១៥ កើតខែពិសាខ និង ពិធីបុណ្យមាឃបូជា ដែលប្រារព្ធធ្វើឡើងនៅថ្ងៃ ១៥កើតខែមាឃ ។ ដោយឡែកបុណ្យវិសាខបូជាក៏ត្រូវបានអង្គការសហប្រជាជាតិទទួលស្គាល់ថាពិធីបុណ្យរបស់ពិភពលោក តាមភាសាអង់គ្លេសថា UN Day of Visakh ។