ប្រតិភូខ្មែរកម្ពុជាក្រោម គោរពវិញ្ញាណក្ខន្ធ អតីតនាយករដ្ឋមន្ត្រី ឯកឧត្ដម ប៉ែន សុវណ្ណ

ថ្ងៃទី០៤ ខែវិច្ឆិកា ឆ្នាំ២០១៦ គណៈប្រតិភូសហព័ន្ធខ្មែរកម្ពុជាក្រោម និង សមាគមព្រះសង្ឃខ្មែរកម្ពុជាក្រោមអាមេរិកខាងជើងបានយកកម្រងផ្កា ចូលគោរពវិញ្ញាណក្ខន្ធ និង រំលែកទុក្ខនឹងគ្រួសារសពឯកឧត្ដម ប៉ែន សុវណ្ណ នៅវត្តនួនមុនីរាម (ហៅវត្តថាន់) ។

គណៈប្រតិភូដឹកនាំដោយលោកតាំង សារៈ ប្រធានសាខាសហព័ន្ធខ្មែរកម្ពុជាក្រោមប្រចាំព្រះរាជាណាចក្រកម្ពុជា រួមនិងព្រះសង្ឃ និង តំណាងអង្គការ សមាគមខ្មែរកម្ពុជាក្រោមមួយចំនួន បានចូលរួមគោរពវិញ្ញាណក្ខន្ធឯកឧត្ដម ប៉ែន សុវណ្ណា នៅវេលាម៉ោង ១៥ និង ០០ នាទី ។ ក្រោយពីបានដាក់កម្រងផ្កាគោរពវិញ្ញាណក្ខន្ធ ព្រះតេជព្រះគុណ ថាច់ ហាសំអាង តំណាងឲ្យសមាគមព្រះសង្ឃខ្មែរកម្ពុជាក្រោមអាមេរិកខាងជើង និង លោកតាំង សារៈ តំណាងឲ្យសហព័ន្ធខ្មែរកម្ពុជាក្រោមពិភពលោកបាននិមន្ត និង អញ្ជើញសរសេរក្នុងសៀវភៅកាន់ទុក្ខផងដែរ ។

ក៏ក្នុងឱកាសនេះ គណៈប្រតិភូក៏បាននាំយកនូវថវិកា ចំនួន $៣០០ (បីរយដុល្លារសហរដ្ឋអាមេរិក) ដែលជាថវិកាបានមកពីសហព័ន្ធខ្មែរកម្ពុជាក្រោម និង សមាគមព្រះសង្ឃខ្មែរកម្ពុជាក្រោមអាមេរិកខាងជើងចូលកុសលផងដែរ ។

ឯកឧត្ដម ប៉ែន សុវណ្ណ ជាអតីតនាយករដ្ឋមន្ត្រីប្រជាមានិតកម្ពុជា និង ជាសមាជិករដ្ឋសភាកម្ពុជាអតីតកាល៥ មណ្ឌលខេត្តកំពង់ស្ពឺ បានទទួលមរណភាព កាលពីថ្ងៃសៅរ៍ ទី ២៩ ខែតុលា ឆ្នាំ ២០១៦ ដោយរោគាពាធ នៅគេហដ្ឋានរបស់លោកក្នុងក្រុងដូនកែវខេត្តតាកែវ ក្នុងជន្មាយុ ៨០ ឆ្នាំ ។