គណៈកម្មាធិការនាយកនៃមិត្តសមាគមខ្មែរកម្ពុជាក្រោម ចូលសួរសុខទុក្ខលោក ចៅ សំអឿន

កាលពីថ្ងៃទី១៧ ខែមករា ឆ្នាំ២០១៦ គណៈកម្មាធិការនាយកនៃមិត្តសមាគមខ្មែរកម្ពុជាក្រោម ដែលដឹកនាំដោយលោក ប៊ុន មុនី ប្រធានសមាគម បានចុះទៅសួរសុខទុក្ខលោកចៅ សំអឿន ប្រធានស្នងការផែនការណ៍ របស់សមាគម ដែលកំពុងសម្រាកព្យាបាលជំងឺនៅផ្ទះ នៅឃុំឈើខ្មៅ ស្រុកកោះធំ ខេត្តកណ្ដាល ។

លោក ប៊ុន មុនី ជូនថវិកាដល់លោក ចៅ សំអឿន នៅគេហដ្ឋានរបស់លោក នៅស្រុកកោះធំ ខេត្តកណ្ដាល

មានប្រសាសន៍ក្នុងពេលទៅសួរសុខទុក្ខនេះ លោកប៊ុន មុនី បានរំឭកឡើងថា មិត្តសមាគមជាអង្គការមនុស្សធម៌ ដែលមានគោលបំណងសំខាន់បំផុតគឺកៀងគរបងប្អូនខ្មែរកម្ពុជាក្រោមឲ្យឯកភាព សមាគ្គី ដើម្បីជួយគ្នាទៅវិញទៅមកក្នុងគ្រាអាសន្នដូចពេលនេះ ។

លោកប៊ុន មុនី ប្រធានមិត្តសមាគមខ្មែរកម្ពុជាក្រោមក៏បានទទួលស្គាល់លោកចៅ សំអឿន មិនត្រឹមតែជាមន្ត្រីសកម្មមួយរូបរបស់សមាគម លោកនៅថែមទាំងជាសកម្មជនដ៏សកម្មមួយរូបក្នុងសង្គមខ្មែរកម្ពុជាក្រោម ទោះបីជីវភាពគ្រួសារមានឧបសគ្គមួយចំនួនក្ដី តែកន្លែងណាដែលខ្មែរក្រោមត្រូវការ តែងតែឃើញលោកចៅ សំអឿនមានវត្តមានរួមសុខ រួមទុក្ខនឹងខ្មែរក្រោម ។

ក្នុងឱកាសនេះដែល គណៈកម្មាធិការនាយកក៏បានពាំនាំអំណោយមួយចំនួនជូនលោកចៅ សំអឿន និងគ្រួសារ រួមមាន មី មួយកេស ទឹកត្រីមួយយួរ ទឹកស៊ីអ៊ីវមួយយូរ សាប៊ូ ថ្នាំដុសធ្មេញ និងថវិកាមួយចំនួន ២០០,០០០ រៀល ដែលជាវិភាគទានពីគណៈកម្មាធិការនាយក និង ថវិកា $៤០ និង ៩៥,០០០ រៀល ដែលជាវិភាគទានពីបងប្អូនខ្មែរកម្ពុជាក្រោមជាមន្ត្រីលេខាធិការដ្ឋាននៃអង្គការ សមាគមខ្មែរកម្ពុជាក្រោម ប្រចាំព្រះរាជាណាចក្រកម្ពុជា ។

ក៏ក្នុងឱកាសនេះដែល លោក ចៅ សំអៀង ក៏បានថ្លែងអំណរគុណចំពោះការយកចិត្តទុកដាក់ និង រាប់អានពីសំណាក់បងប្អូនខ្មែរកម្ពុជាក្រោម ។