សិទ្ធមូលដ្ឋាន និង សិទ្ធសម្រេចវាសនាខ្លួនដោយខ្លួនឯងរបស់ខ្មែរកម្ពុជាក្រោមមិនត្រូវបានគោរពឡើយ

តំណាងសហព័ន្ធខ្មែរកម្ពុជាក្រោមបានថ្លែងទៅកាន់វេទិកាសម័យប្រជុំគណៈកម្មាធិការអចិន្ត្រៃយ៍អង្គការសហប្រជាជាតិទទួលបន្ទុកជនជាតិដើមថា សិទ្ធសម្រេចវាសនាខ្លួនដោយខ្លួនរបស់ខ្មែរកម្ពុជាក្រោមមិនត្រូវបានទទួលស្គាល់ឡើយ ។

កញ្ញា សឺន ដានី ថ្លែងក្នុងសម័យប្រជុំអង្គការសហប្រជាជាតិ (រូបភាព VOKK)

កញ្ញ សឺន ដានី តំណាងអោយសហព័ន្ធខ្មែរកម្ពុជាក្រោមបានថ្លែងបញ្ជាក់នៅសម័យប្រជុំរបស់គណៈកម្មាធិការអចិន្ត្រៃយ៍អង្គការសហប្រជាជាតិទទួលបន្ទុកជនជាតិដើមលើកទី ១៥ ដែលបានប្រព្រឹត្តទៅនៅទីស្នាក់ការអង្គការសហប្រជាជាតិនា បូរីញីវយ៉ក់ ( សហរដ្ឋអាមេរិក ) កាលពីថ្ងៃទី ១៧ ខែឧសភា ឆ្នាំ២០១៦ ថាកិច្ចពិភាក្សាជាចំហររវៀងអង្គការសហប្រជាជាតិ និង បណ្ដាប្រទេសជាសមាជិកបានគូសបញ្ជាក់ថា ប្រទេសជាសមាជិកនិមួយៗទទួលស្គាល់ជនជាតិដើម និង គោរពសិទ្ធជនជាតិទាំងនោះទៅតាមខ្លឹមសាររបស់អង្គការសហប្រជាជាតិស្ដីពីជនជាតិដើម ។

កញ្ញា សឺន ដានី បានថ្លែងបញ្ជាក់ទៀតថា សិទ្ធមូលដ្ឋាន និង សិទ្ធសម្រេចវាសនាខ្លួនដោយខ្លួនឯងរបស់ខ្មែរកម្ពុជាក្រោមមិនត្រូវបានគោរពឡើយ ។

កញ្ញា សឺន ដានី ថ្លែងបន្តទៀតថា ព្រះសង្ឃខ្មែរកម្ពុជាក្រោមត្រូវបានគេរំលោភបំពានទាំងពុំមានកំហុស ដែលរហូតមកដល់សព្វថ្ងៃនេះ ព្រះតេជព្រះគុណ លីវ នី និង ព្រះតេជព្រះគុណ ថាច់ ធឿន ដែលជាព្រះចៅអធិការ និង គ្រូសូត្រ វត្តសិរីតាសេក ក្នុងទីរួមខេត្តជ្រោយញ ខេត្តឃ្លាំង កំពុងជាប់ឃុំឃាំងនៅឡើយ ។

គណ: ប្រតិភូសហព័ន្ធខ្មែរកម្ពុជាក្រោម ត្រូវបានសម័យប្រជុំគណៈកម្មាធិការអចិន្ត្រៃយ៍ អង្គការសហប្រជាជាតិទទួលបន្ទុកជនជាតិដើម UNFPII ទទួលអោយចូលរួមក្នុងសម័យប្រជុំនេះចំនួន ១២ ឆ្នាំមកហើយ គឺចាប់ពីឆ្នាំ ២០០៥ ។