មិត្តសមាគមខ្មែរកម្ពុជាក្រោមប្រជុំបូកសរុប និង វាយតម្លៃលទ្ធផលនៃការអនុវត្តផែនការណ៍សម្រាប់ឆមាសទីមួយ

ថ្ងៃអាទិត្យទី២៦ ខែមិថុនា ឆ្នាំ២០១៦ គណៈកម្មាធិការនាយកមិត្តសមាគមខ្មែរកម្ពុជាក្រោមបានបើកអង្គប្រជុំបូកសរុប និង វាយតម្លៃលទ្ធផលនៃការអនុវត្តផែនការណ៍សម្រាប់ឆមាសទីមួយ (ប្រាំមួយខែដើមឆ្នាំ) និង រិះរកយុទ្ធសាស្ត្រអនុវត្តផែនការណ៍សម្រាប់ឆមាសទីពីរ នៅទីស្នាក់ការកណ្ដាលរបស់ខ្លួន ក្រោមអធិបតីភាពរបស់លោក ប៊ុន មុនី ប្រធានមិត្តសមាគមខ្មែរកម្ពុជាក្រោម ។

ចូលរួមអង្គប្រជុំមានវត្តមានរបស់ ១១ ក្នុងចំណោម ១៦ អង្គ និង រូបដែលជាសមាជិក សមាជិកាគណៈកម្មាធិការនាយកនៃមិត្តសមាគមខ្មែរកម្ពុជាក្រោម ។

តាមរបាយការណ៍របស់លោក ស៊ីម វិចិត្រ អគ្គលេខាធិការ ចាប់តាំងពីថ្ងៃទី០៣ ខែមករា ឆ្នាំ២០១៦ រហូតមកដល់ថ្ងៃទី០៨ ខែមិថុនា ឆ្នាំ២០១៦ មិត្តសមាគមខ្មែរកម្ពុជាក្រោមបានចេញប័ណ្ណសមាជិកឲ្យ ១១៤ នាក់ និង ចេញលិខិតបញ្ជាក់ជាខ្មែរមានដើមកំណើតនៅកម្ពុជាក្រោមជូន០៦ ករណី ក្នុងនោះមាន ០១ ករណីជាសមាជិកចាស់របស់មិត្តសមាគម ។ លោកស៊ីម វិចិត្រមានប្រសាសន៍បន្ថែមទៀតថា សមាជិក សមាជិការបស់មិត្តសមាគម ពេលបង្ហាញប័ណ្ណសមាជិក និង លិខិតបញ្ជាក់ពីមិត្តសមាគមត្រូវបានអាជ្ញាធរដែនដីទទួលស្គាល់ថាជាជនជាតិខ្មែររបស់នៅស្របច្បាប់នៅមូលដ្ឋាន និង ជួលសម្រួលដល់ការរស់នៅរបស់ពួកគាត់ជាច្រើន ។

របាយការណ៍ដដែលក៏បានបង្ហាញអំពីសកម្មភាពសង្គមកិច្ច មនុស្សធម៌ និង សកម្មភាពតភ្ជាប់រវាងគណៈកម្មាធិការនាយក និង សមាជិក សមាជិការបស់សមាគមផងដែល ឧទាហរណ៍ដូចជាមិត្តសមាគមបានចូលួមសួរសុខទុក្ខសមាជិកដែលត្រូវជំងឺតម្កាត់ ចូលរួមរំលែកទុក្ខគ្រួសារបងប្អូនខ្មែរកម្ពុជាក្រោមដែលមានគ្រោះអាសន្ន និងទៅធ្វើអន្តរាគមន៍ និង ផ្ដល់យោបល់ដល់សមាជិកដែលមានវិបត្តិផ្លូវច្បាប់ជាដើម ។

បន្តបន្ទាប់ ប្រធានស្នងការនីមួយៗបានរាយការណ៍អំពីសកម្មភាពរបស់ខ្លួនក្នុងប្រាំមួយខែដើមឆ្នាំ២០១៦នេះ ។ ស្នងការទាំងអស់បានជម្រាបអង្គប្រជុំនូវលទ្ធផលដែលប្រមូលបាន និង លើកឡើងនូវកង្វះខាតដែលស្នងការខ្លួនទទួលបន្ទុកមិនទាន់សម្រេចបាន ។ និយាយរួមស្នងការទាំងអស់នៅមិនទាន់ពេញចិត្តនូវលទ្ធផលដែលប្រមូលបាននោះទេ ហើយក៏បានប្ដេជ្ញាចិត្តខិតខំប្រឹងប្រែងដើម្បីបម្រើផលប្រយោជន៍បងប្អូនខ្មែរកម្ពុជាក្រោមឲ្យបានល្អប្រសើរជាងនោះទៀត ដូចគោលបំណងរបស់មិត្តសមាគមខ្មែរកម្ពុជាក្រោម ។

អំពីថវិកាសម្រាប់សកម្មភាពរបស់មិត្តសមាគម របាយការណ៍របស់លោក គឹម វិសាល អគ្គហេរញ្ញិក បានបង្ហាញយ៉ាងច្បាស់នូវរាល់ខ្ទង់ចំណូល និង ចំណាយរបស់មិត្តសមាគមខ្មែរកម្ពុជាក្រោមក្នុងប្រាំមួយខែកន្លងនេះ ។ យោងតាមរបាយការណ៍របស់លោកអគ្គហេរញ្ញិក ចំណូលរបស់មិត្តសមាគមខ្មែរកម្ពុជាក្រោម ភាគច្រើនបានមកពីការវិភាគទានរបស់បងប្អូនសមាជិក សមាជិកា និង ការបរិច្ចាគរបស់សមាជិក សមាជិកានៃគណៈកម្មាធិការនាយកផ្ទាល់ ។

អង្គប្រជុំក៏បានអនុម័តិសំណើរបស់លោកប្រធានប៊ុន មុនី អំពីការព្យួរការអនុវត្តនូវប្រការទី៤៨ និង ប្រការទី៤៩ នៃលក្ខន្តិកៈនៃមិត្តសមាគមខ្មែរកម្ពុជាក្រោម និង សំណើបញ្ចូលលោក ចៅ គឹមយិន ដែលមានស្រុកកំណើតនៅស្រុកស្វាយទង ខេត្តមាត់ជ្រូក ចូលក្នុងគណៈកម្មាធិការនាយកក្នុងតួនាទីជាអគ្គលេខាធិការរងទទួលបន្ទុកការងាររដ្ឋាបាលដោយសំឡេងគាំទ្រ ១០០% ។

នៅថ្ងៃអាទិត្យ ទី០៣ ខែកក្កដាខាងមុខនេះ គណៈកម្មាធិការនាយកនៃមិត្តសមាគមខ្មែរកម្ពុជាក្រោមនឹងបន្តអង្គប្រជុំនេះដើម្បីពិភាក្សារិះរកយុទ្ធសាស្ត្រអនុវត្តផែនការណ៍សម្រាប់ឆមាសទីពីរឆ្នាំ២០១៦ ៕