បន្តអនុវត្តិផែនការណ៍សកម្មភាពប្រចាំឆមាសទី២
ឆ្នាំ២០១៦ នៅថ្ងៃអាទិត្យទី១៨ ខែកញ្ញា ឆ្នាំ២០១៦ គណៈកម្មាធិការនាយកមិត្តសមាគមខ្មែរកម្ពុជាក្រោម
ដឹកនាំដោយលោកប្រធាន ប៊ុន មុនី និង សហការីបានចុះទៅធ្វើប័ណ្ណសមាជិកជូនបងប្អូនប្រជាពលរដ្ឋនៅភូមិសាមគ្គី
សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ ។
ការចុះធ្វើប័ណ្ណសមាជិកនេះជាលើកទី០២
បន្តនឹងលើកទីមួយដែលបានធ្វើឡើងនៅថ្ងៃទី១១ ខែកញ្ញា ឆ្នាំ២០១៦ កន្លងនេះ ។
ក្នុងឱកាសនេះ មានបងប្អូនខ្មែរកម្ពុជាក្រោមចំនួន៤៥ នាក់ ក្នុងនោះមាន ប្រុស ១៧
នាក់ និង ស្រី២៨ ត្រូវបានសម្រេចទទួលឲ្យចូលជាសមាជិកថ្មី និង
បានលោកប្រធានប៊ុន មុនី សម្រេចផ្ដល់ប័ណ្ណសមាជិកជូន ។
គួររំឭកផងដែរថា
តាំងពីបានការទទួលស្គាល់ពីទីស្ដីការគណៈរដ្ឋមន្ត្រីនៃព្រះរាជាណាចក្រកម្ពុជា
នាំឆ្នាំ១៩៩៣
មិត្តសមាគមខ្មែរកម្ពុជាក្រោមតែងតែផ្ដល់ប័ណ្ណសមាជិកជូនសមាជិករបស់ខ្លួនសម្រាប់ប្រើប្រាស់ដើម្បីជាលិខិតបទដ្ឋានបញ្ជាក់អំពីអត្តសញ្ញាណបងប្អូនពិតជាខ្មែរកម្ពុជាក្រោម
។
តាមលក្ខន្តិកៈរបស់មិត្តសមាគមខ្មែរកម្ពុជាក្រោម
បងប្អូនជនរួមជាតិខ្មែរណាមានដើមកំណើតនៅកម្ពុជាក្រោម ឬ មានឪពុកម្ដាយ ឬ ឪពុក
ឬ ម្ដាយជាខ្មែរមានដើមកំណើតកម្ពុជាក្រោម មានអាយុពីគ្រប់ ១៨ (ដប់ប្រាំបី) ឡើងទៅ មិនប្រកាន់ភេទ វណ្ណៈស្រទាប់
ស្ម័គ្រចិត្តសូមចូលជាសមាជិកសមាគម ត្រូវបានសមាគមពិនិត្យឲ្យចូលជាសមាជិក
និង ផ្ដល់ប័ណ្ណសមាជិកជូន ។
ក្នុងករណីបងប្អូនខ្មែរកម្ពុជាក្រោមណាចង់ចូលជាសមាជិកនៃមិត្តសមាគមខ្មែរកម្ពុជាក្រោម
សូមអញ្ជើញមកទីស្នាក់ការរបស់មិត្តសមាគម វត្តសាមគ្គីរង្សី ភូមិទ្រា២
សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ
ដោយយកមកតាមនូវលិខិតណាមួយបញ្ជាក់ថាបងប្អូនពិតជាខ្មែរកម្ពុជាក្រោមដូចជា
៖ ប័ណ្ណសមាជិករបស់មិត្តសមាគមដែលអស់សុពលភាព សំបុត្រកំណើត (Giấy khai sanh) អត្តសញ្ញាណប័ណ្ណ (Giấy
Chứng minh nhân dân ឬ
Thẻ Căn cước) សៀវភៅគ្រួសារ (Sổ hộ khẩu) ឬ ឆាយា ជាដើម និង រូបថត ៣x៤ ចំនួនពីរសន្លឹក ។
គួររំឭកផងដែរថា
កាលពីថ្ងៃទី១១ ខែកញ្ញា ឆ្នាំ២០១៦កន្លងទៅនេះ មិត្តសមាគមខ្មែរកម្ពុជាក្រោម បានផ្ដល់ប័ណ្ណសមាជិកថ្មីជូនបងប្អូនខ្មែរកម្ពុជាក្រោមចំនួន
៤១ នាក់ ក្នុងនោះមាន ប្រុសចំនួន ២៣ នាក់ និង ស្រីចំនួន ១៨ នាក់
សូមបញ្ជាក់ថា
ការផ្ដល់ប័ណ្ណសមាជិកនេះ
មិត្តសមាគមខ្មែរកម្ពុជាក្រោមមិនតម្រូវការឲ្យអ្នកសូមចូលបង់ប្រាក់ឡើយ !
ចែករំលែកអត្ថបទ
