អង្គប្រជុំរបស់គណៈកម្មាធិការនាយកមិត្តសមាគមខ្មែរកម្ពុជាក្រោមកាលពីថ្ងៃអាទិត្យ
ទី១៩ ខែកុម្ភៈ ឆ្នាំ២០១៧ បានពិភាក្សាអំពីស្ថានភាពទូកងរបស់មិត្តសមាគម ហើយយល់ឃើញថា
ទូកងចាស់ដែលមិត្តសមាគមកំពុងមានហើយធ្លាប់បានចូលរួមប្រណាំងក្នុងព្រះរាជពិធីបុណ្យអុំទូក
បណ្ដែតប្រទីប អកអំបុក និង សំពះព្រះខែក្នុងឆ្នាំ២០១៦ និង ១៦ ឆ្នាំកន្លងនេះ គឺចាស់
និង មានការខូចខាតច្រើនណាស់ មិនអាចប្រើប្រាស់បានទៀតទេ ។
សមាជិកគណៈកម្មាធិការនាយកទាំងអស់បានលើកឡើងថា កាលឆ្នាំ២០១៦
កន្លងនេះ ទូកងដែលមានឈ្មោះថា «ខ្មែរកម្ពុជាក្រោមមានជ័យ» ដែលជាទូកងតែមួយគត់របស់ខ្មែរកម្ពុជាក្រោមនៅក្នុងព្រះរាជាណាចក្រកម្ពុជា
និង នៅទូទាំងពិភពលោកក្រៅដែនដីកម្ពុជាក្រោម អាចចូលរួមប្រណាំងដោយបានពានរង្វាន់លេខ២
គឺដោយសារតែកត្តាមនុស្ស ពោលគឺគណៈកម្មការទូ និង កីឡាករបានខិតខំប្រឹងប្រែងអស់ពីសមត្ថភាព
រីឯកត្តាទូកវិញ គឺការដាក់ចុះទឹកបានក៏ជាបញ្ហាធំដែរ កុំថាឡើងចូលរួមប្រណាំង
។
ក្រោយពីបានពិភាក្សាយ៉ាងល្អិតល្អន់ អង្គប្រជុំបានឯកភាព ១០០% សម្រេចថា
គណៈកម្មាធិការនាយកមិត្តសមាគមខ្មែរកម្ពុជាក្រោមនឹងធ្វើទូកងថ្មីតាមបែបខ្មែរកម្ពុជាក្រោមដើម្បីបន្តចូលរួមក្នុងការប្រណាំងទូកងនៅព្រះរាជាណាចក្រកម្ពុជានៅពេលខាងមុខទៀត
។
គណៈកម្មាធិការនាយកមិត្តសមាគមខ្មែរកម្ពុជាក្រោម
ក៏ឯកភាពនឹងបើកអង្គប្រជុំមួយទៀតនៅថ្ងៃអាទិត្យ ទី០៥ ខែមីនា ឆ្នាំ២០១៧
ខាងមុខដើម្បីពិភាក្សាលំអិតអំពីគម្រោងថវិកា និង
មធ្យោបាយទាំងឡាយដែលធ្វើបានទូកងខ្មែរកម្ពុជាក្រោមថ្មី ។
ចែករំលែកអត្ថបទ
